Erabateko kalitate
Erabateko kalitatea, bikaintasuna ere deitu ohi dena, erakunde bateko eremu guztietan eta eragile guztiei begira kalitatearen helburua txertatu eta garatzen duen antolakuntza da. Produktuaren kalitatea nabarmentzen duen kalitate-kontrolaz eta bezeroaren asebetetzeaz arduratzen den kalitatearen kudeaketaz haraindi, erabateko kalitateak erakundeko eragile eta pertsona guztien parte hartzea bultzatu eta erakundearen prozesu guztien etengabeko hobekuntzaren bidez arlo guztietan emaitza bikainak lortzea ditu helburu.
Erabateko kalitatea, filosofia gisa, ondorengo 8 printzipioetan oinarritzen da:
- Emaitzekiko orientabidea: Erakundeak zer lortu nahi den zehazten du eta aldiro neurketak egiten ditu emaitzak lortu dituen ala ez jakiteko.
- Bezeroarekiko orientabidea: Erakundeak interes-talde edo bezero guztiak asebetetzea du helburu eta kudeaketa osoa honen arabera antolatu du.
- Buruzagitza eta koherentzia emaitzetan: Lidergoak argi eduki behar ditu erakundearen ikusmira eta ikuspegia eta hartutako erabakiak hauekin koherenteak izan behar dute.
- Prozesuen eta gertakarien bidezko kudeaketa: Prozesuen bidezko kudeaketa sistema bat ezarrita dago eta erabakiak gertakari eta emaitza objektiboen arabera hartzen dira.
- Pertsonak garatu eta inplikatzea: Erakundeko pertsona guztiek pertsonalki garatzeko eta kudeaketan parte hartzeko aukera dute.
- Etengabeko ikaskuntza, berrikuntza eta hobekuntza: Erakundea bere kudeaketa jardueretan etengabe hobetuz doa, akatsetatik ikasiz eta lorpenak orokortuz.
- Itunen garapena: Erakundeak bere interes-taldeei balio gehiago emateko lagungarri izan ditzakeen beste erakundeak bilatu eta hauekin elkarkidetza itunak ezartzen ditu, hobekuntzarako iturri bihurtzen direlarik.
- Erantzukizun soziala: Erakundeak gizartearen beharrak eta arazoak (sozialak, ingurugiro arlokoak, ekonomikoak, etab.)ulertzen ditu eta hauek hobetzeko jarduerak antolatzen ditu.
Ikus, gainera
- EFQM bikaintasun-eredu
Kanpo estekak
Datuak: Q381001